ເພື່ອຮັບປະກັນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນກຳມະບານລາວທົ່ວປະເທດ ຄັ້ງທີ VIII ແລະ ແຜນພັດທະນາວຽກງານ […]

ເພື່ອຮັບປະກັນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນກຳມະບານລາວທົ່ວປະເທດ ຄັ້ງທີ VIII ແລະ ແຜນພັດທະນາວຽກງານກຳມະບານລາວ ໃນທ້າຍສະໄໝ ສະຫະພັນກຳມະບານແຕ່ລະຂັ້ນ ຕ້ອງໄດ້ສຸມໃສ່ບາງບັນຫາດັ່ງນີ້:
1. ເພີ່ມທະວີວຽກງານໂຄສະນາສຶກສາອົບຮົມການເມືອງ-ແນວຄິດ ໃຫ້ສະມາຊິກກຳມະບານ, ກຳມະກອນ ແລະ ຜູ້ອອກແຮງງານໃຫ້ມີການຫັນປ່ຽນໃໝ່ດ້ານແນວຄິດ, ກໍາແໜ້ນເຊື່ອມຊຶມຕໍ່ແນວທາງແຜນນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX, ກົດໝາຍ, ລະບຽບການຂອງລັດ, ແຜນພັດທະນາວຽກງານກຳມະບານ, ຮູ້ສິດພັນທະຂອງຕົນ, ຍົກລະດັບຄວາມຮູ້, ຄວາມສາມາດໃນການຫັນເປັນທັນສະໄໝກ່ຽວກັບການໂຄສະນາ, ເຮັດດ້ວຍຫຼາຍຮູບການ, ວິທີການ ທັງເຊິ່ງໜ້າ ແລະ ຜ່ານສື່ອອນລາຍ ໃຫ້ກວ້າງຂວາງ, ເລິກເຊິ່ງ ແລະ ແທດເໝາະກັບກຸ່ມເປົ້າໝາຍ;
2. ສະຫະພັນກຳມະບານແຕ່ລະຂັ້ນ ຕ້ອງໄດ້ເອົາໃຈໃສ່ປົກປ້ອງສິດຜົນປະໂຫຍດອັນຊອບທຳຂອງສະມາຊິກກໍາມະບານ, ກຳມະກອນ ແລະ ຜູ້ອອກແຮງງານ, ເບິ່ງແຍງຊີວິດການເປັນຢູ່ທາງດ້ານວັດຖຸ ແລະ ຈິດໃຈ ຂອງຜູ້ອອກແຮງງານທີ່ເຮັດວຽກງານຢູ່ຫົວໜ່ວຍແຮງງານທັງພາກລັດ ແລະ ເອກະຊົນ ເຊິ່ງສິດ ແລະ ຜົນປະໂຫຍດເຫຼົ່ານັ້ນຕ້ອງຮັບປະກັນດ້ວຍກົດໝາຍ, ລະບຽບການ ແລະ ຂໍ້ກຳນົດຕ່າງໆ ທີ່ວາງອອກ, ຊຸກຍູ້ໃຫ້ຜູ້ໃຊ້ແຮງງານ ແລະ ຜູ້ອອກແຮງງານ ເຊັນສັນຍາແຮງງານ ບຸກຄົນ ແລະ ລວມໝູ່ ເພື່ອສ້າງສາຍພົວພັນແຮງງານທີ່ດີ ບໍ່ໃຫ້ເກີດຂໍ້ຂັດແຍ່ງແຮງງານ ແລະ ການເຄື່ອນຍ້າຍແຮງງານ;
3. ການຈັດຕັ້ງທັງພາກລັດ ແລະ ເອກະຊົນ ຕ້ອງສ້າງເງື່ອນໄຂ, ອໍານວຍຄວາມສະດວກໃຫ້ແກ່ສະຫະພັນກຳມະບານແຕ່ລະຂັ້ນ ເພື່ອຂະຫຍາຍການຈັດຕັ້ງ ແລະ ສະມາຊິກກໍາມະບານ ເຂົ້າສູ່ຫົວໜ່ວຍແຮງງານ ໃຫ້ທົ່ວເຖິງ; ສືບຕໍ່ປັບປຸງ, ຄຸ້ມຄອງ, ຊຸກຍູ້, ຕິດຕາມ ການຈັດຕັ້ງກໍາມະບານທີ່ມີແລ້ວ ໃຫ້ມີການເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ ພ້ອມທັງ ເຮັດໃຫ້ສະມາຊິກກໍາມະບານ ຮັບຮູ້, ເຂົ້າໃຈ ແລະ ຕື່ນຕົວປະຕິບັດພັນທະໜ້າທີ່ ຂອງຕົນໃຫ້ມີຄວາມເຂັ້ມແຂງຂື້ນ;
4. ສະຫຼຸບ ແລະ ປະເມີນຜົນການຈັດຕັ້ງປະຕິບັດ ຂໍ້ແຂ່ງຂັນ 5 ເປັນເຈົ້າ ຂອງສະຫະພັນກຳມະບານລາວ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ, ປະຕິບັດວຽກງານວິຊາສະເພາະ ຢ່າງປະດິດສ້າງ, ຊອກໃຫ້ເຫັນກົມກອງ, ບຸກຄົນ ດີເດັ່ນ ໃນຂະບວນການ ເພື່ອຢັ້ງຢືນ ແລະ ຮັບຮອງເປັນສະຫະພັນກໍາມະບານ 5 ເປັນເຈົ້າ;
ເອົາໃຈໃສ່ສ້າງຂະບວນການ ເພື່ອຂໍໍ່ານັບຮັບຕ້ອນ ສາມວັນປະຫວັດສາດ ຂອງຊາດ, ຂອງພັກ, ຂອງກຳມະບານ, ກອງປະຊຸມໃຫຍ່ ຄັ້ງທີ XII ຂອງພັກ ແລະ ກອງປະຊຸມໃຫຍ່ຜູ້ແທນກໍາມະບານລາວ ທົ່ວປະເທດ ຄັ້ງທີ IX ໃຫ້ມີເນື້ອໃນເລີກເຊິ່ງ ແລະ ເປັນຂະບວນການຟົດຟື້ນ;
5. ຄະນະນໍາສະຫະພັນກໍາມະບານ ແຕ່ລະຂັ້ນຕ້ອງຍຶດໜັ້ນ ແລະ ປະຕິບັດໃຫ້ຖືກຕ້ອງ ແບບແຜນວິທີການເຮັດວຽກຕາມຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ບຸກຄົນຮັບຜິດຊອບ; ມີລະບອບການປະຊຸມເປັນປົກກະຕິ, ກອງປະຊຸມຕ້ອງມີເນື້ອໃນຈະແຈ້ງ, ມີການປຶກສາຫາລື ຢ່າງມີປະຊາທິປະໄຕ, ມີການອອກມະຕິ, ເມື່ອກອງປະຊຸມຕົກລົງຮັບຮອງແລ້ວ ຕ້ອງມີການເຜີຍແຜ່ໃຫ້ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານຮັບຮູ້ເຂົ້າໃຈ ແລະ ຈັດຕັ້ງປະຕິບັດໃຫ້ໄດ້ຕາມມະຕິວາງອອກ ເຊັ່ນ: ປະຕິບັດໃຫ້ຖືກຕ້ອງຕາມຫຼັກການລວມສູນປະຊາທິປະໄຕ; ການເຮັດວຽກມີແຜນການ, ມີຈຸດສຸມ ແລະ ທິດທາງແຜນການຕິດແທດຕົວຈິງ; ການເຮັດວຽກມີການຕິດຕາມ, ກວດກາ, ມີຄວາມເດັດຂາດເຂັ້ມງວດທາງດ້ານວິໄນ ແລະ ກົດໝາຍ; ມີແບບແຜນວຽກງານຕິດແທດກັບມະຫາຊົນກໍ່ຄື ປະຊາຊົນຊາວຜູ້ອອກແຮງງານບັນດາເຜົ່າ;
6. ຄະນະກວດກາກໍາມະບານແຕ່ລະຂັ້ນ ຕ້ອງເພີ່ມທະວີ ຕິດຕາມ, ກວດກາ ແລະ ຊຸກຍູ້ ການເຄື່ອນໄຫວວຽກງານກຳມະບານ ຕາມແບບແຜນການນຳພາ, ແບບແຜນວິທີເຮັດວຽກ ປະຕິບັດຕາມກົດໝາຍວ່າດ້ວຍກຳມະບານລາວ ແລະ ກົດລະບຽບ ຂອງສະຫະພັນກຳມະບານລາວ; ເອົາໃຈໃສ່ ເກັບກຳຄຳຄິດ, ຄຳເຫັນ, ຂໍ້ສະເໜີ, ຫາງສຽງສັງຄົມ ຂອງສະມາຊິກກຳມະບານ, ກຳມະກອນ ແລະ ຜູ້ອອກແຮງງານ, ເພື່ອນຳສະເໜີໃຫ້ພາກສ່ວນທີ່ກ່ຽວຂ້ອງ ຄົ້ນຄວ້າ ແລະ ແກ້ໄຂໃຫ້ທັນເວລາ;
7. ສືບຕໍ່ ເພີ່ມທະວີການພົວພັນ ຮ່ວມມື ກັບກຳມະບານເພື່ອນມິດຍຸດທະສາດ, ເພື່ອນມິດສາກົນ, ອົງການຈັດຕັ້ງສາກົນ ຕາມແນວທາງ ການຕ່າງປະເທດຂອງພັກ ເພື່ອຍາດເເຍ່ງເອົາບົດຮຽນ, ປະສົບການ, ທຶນຮອນ, ເຕັກໂນໂລຊີທີ່ທັນສະໄໝ ເຂົ້າໃນການພັດທະນາວຽກງານກຳມະບານ ໃຫ້ມີການຫັນປ່ຽນໃໝ່ຢ່າງຕັ້ງໜ້າ. ພ້ອມດຽວກັນນັ້ນຕ້ອງສ້າງເງື່ອນໄຂ ໃຫ້ສະຫະພັນກຳມະບານກະຊວງ, ອົງການ, ແຂວງ ແລະ ນະຄອນຫຼວງວຽງຈັນ ເພີ່ມທະວີການພົວພັນຮ່ວມມືຕ່າງປະເທດ ຕາມພາລະບົດບາດ, ຂອບເຂດ ແລະ ຄວາມຮັບຜິດຊອບຂອງຕົນ;
8. ສືບຕໍ່ກະກຽມດຳເນີນກອງປະຊຸມໃຫຍ່ ຂອງສະຫະພັນກຳມະບານແຕ່ລະຂັ້ນ ໃຫ້ສຳເລັດຕາມລະດັບຄາດໝາຍ ເພື່ອກະກຽມໃຫ້ແກ່ກອງປະຊຸມໃຫຍ່ຜູ້ແທນກຳມະບານລາວທົ່ວປະເທດ ຄັ້ງທີ IX ທີ່ຈະເປີດຂຶ້ນໃນປີ 2025;
9. ສະຫະພັນກຳມະບານ ຕ້ອງນຳເອົາເນື້ອໃນ ມະຕິ 04/ກມສພ ວ່າດ້ວຍ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ ເພື່ອຜັນຂະຫຍາຍ ມະຕິດັ່ງກ່າວ ສ້າງແຫຼ່ງລາຍຮັບມາພັດທະນາວຽກງານກຳມະບານ ໃຫ້ມີຄວາມເຂັ້ມແຂງ.
ໃນໂອກາດອັນສະຫງ່າລາສີນີ້, ຕາງໜ້າໃຫ້ຄະນະປະທານ, ຄະນະບໍລິຫານງານສູນກາງສະຫະພັນກຳມະບານລາວ, ຂ້າພະເຈົ້າຮຽກຮ້ອງມາຍັງສະຫະພັນກຳມະບານແຕ່ລະຂັ້ນ ຈົ່ງເພີ່ມທະວີຄວາມສາມັກຄີເປັນປຶກແຜ່ນ ພາຍໃຕ້ການນຳພາ ຂອງພັກ; ເຊີດຊູຄວາມຮັບຜິດຊອບໃນໜ້າທີ່ການເມືອງ, ຕັ້ງໜ້າພັດທະນາວຽກງານກຳມະບານໃຫ້ມີຄວາມເຂັ້ມແຂງ, ຜ່ານຜ່າຄວາມຫຍຸ້ງຍາກ ນາໆປະການ, ພ້ອມທັງປະກອບສ່ວນເຂົ້າໃນພາລະກິດ ແຫ່ງການປົກປັກຮັກສາ ແລະ ພັດທະນາປະເທດຊາດ ໃຫ້ກ້າວຂື້ນສູ່ຈຸດໝາຍທີ່ກຳນົດໄວ້.
——————————-
ໃຫ້ການສະໜັບສະໜູນໂດຍ: ບໍລິສັດ ເອັນເອສວີ ບໍລິການ ຈຳກັດຜູ້ດຽວ
– ບໍລິການຂາຍ, ສ້ອມແປງເຄື່ອງຄອມພິວເຕີ, ອຸປະກອນໄອທີ ແລະ ເຄື່ອງຮັບໃຊ້ຫ້ອງການ
– ໂທ: (+85621) 252 483 

See less