ກອງປະຊຸມເປີດກວ້າງຄົບຄະນະບໍລິຫານງານສູນກາງສະຫະພັນກຳມະບານລາວ ຄັ້ງທີ 5 ສະໄໝທີ VIII

ໃນວັນທີ 25 ທັນວາ 2024 ສູນກາງສະຫະພັນກຳມະບານລາວ ຈັດກອງປະຊຸມເປີດກວ້າງຄົບຄະນະບໍລິຫານງານສູນກາງສະຫະພັນກຳມະບານລາວ ຄັ້ງທີ 5 ສະໄໝທີ VIII ທີ່ສູນກາງສະຫະພັນກຳມະບານລາວ ໂດຍການເປັນປະທານຂອງ ທ່ານ ເລັດ ໄຊຍະພອນ ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນກຳມະບານລາວ,ມີບັນດາຮອງປະທານຄະນະບໍລິຫານງານສູນກາງສະຫະພັນກຳມະບານລາວ, ຄະນະບໍລິຫານງານສູນກາງສະຫະພັນກຳມະບານລາວ ສະໄໝທີ VIII, ແຂກຮັບເຊີນຈາກສະພາແຫ່ງຊາດ, ອົງການພາຄີ ແລະ ບັນດາສະຫະພັນກຳມະບານ ກະຊວງ, ອົງການ, ນະຄອນຫລວງວຽງຈັນ ແລະ ແຂວງເຂົ້າຮ່ວມ .

ທ່ານ ເລັດ ໄຊຍະພອນ ໄດ້ກ່າວວ່າ: ກອງປະຊຸມໃນຄັ້ງນີ້ ພວກເຮົາຈະໄດ້ພ້ອມກັນສະຫຼຸບ, ຕີລາຄາຄືນ ຜົນສຳເລັດກອງປະຊຸມຄົບຄະນະບໍລິຫານງານສູນກາງສະຫະພັນກຳມະບານລາວ ຄັ້ງທີ 4 ສະໄໝທີ VIII ແລະ ກະກຽມດໍາເນີນກອງປະຊຸມໃຫຍ່ຜູ້ແທນກຳມະບານລາວ ທົ່ວປະເທດ ຄັ້ງທີ IX ໃນປີ 2025, ບັນດາເນື້ອໃນເອກະສານທີ່ຈະຄົ້ນຄວ້າ, ພິຈາລະນາ ແລະ ເປັນເອກະພາບກັນ ມີດັ່ງນີ້: ບົດສະຫຼຸບ, ຕີລາຄາຜົນສຳເລັດກອງປະຊຸມຄົບຄະນະບໍລິຫານງານສູນກາງສະຫະພັນກຳມະບານລາວ ຄັ້ງທີ 4 ສະໄໝທີ VIII ແລະ ທິດທາງແຜນການທ້າຍສະໄໝ,ສະຫຼຸບການຈັດຕັ້ງປະຕິບັດແຜນພັດທະນາວຽກງານກຳມະບານ 1 ປີ ຜ່ານມາ ແລະ ວຽກງານຈຸດສຸມທ້າຍສະໄໝ,ຜ່ານຮ່າງບົດສະຫຼຸບການຈັດຕັ້ງປະຕິບັດແຜນພັດທະນາວຽກງານກຳມະບານ 5 ປີ ຄັ້ງທີ IV ໃນໄລຍະ 1 ປີຜ່ານມາ ແລະ ທິດທາງແຜນການ ທ້າຍສະໄໝ,ຜ່ານຮ່າງບົດລາຍງານການເມືອງຕໍ່ກອງປະຊຸມໃຫຍ່ຜູ້ແທນກໍາມະບານລາວ ທົ່ວປະເທດ ຄັ້ງທີ IX ແລະ ທິດທາງແຜນການ 5 ປີຕໍ່ໜ້າ(2026-2030),ຜ່ານຮ່າງບົດສະຫຼຸບການຈັດຕັ້ງປະຕິບັດແຜນພັດທະນາວຽກງານກຳມະບານລາວ 5 ປີ ຄັ້ງທີ IV ແລະ ທິດທາງແຜນການ 5 ປີຕໍ່ໜ້າ (2026-2030),ຜ່ານຮ່າງແຜນຍຸດທະສາດ ແລະ ວິໄສທັດພັດທະນາວຽກງານກຳມະບານລາວ,ຜ່ານຮ່າງກົດລະບຽບສະບັບປັບປຸງຂອງສະຫະພັນກຳມະບານລາວ ສະໄໝທີ IX,ຜ່ານຮ່າງເນື້ອໃນຂໍ້ແຂ່ງຂັນ 5 ເປັນເຈົ້າສະບັບປັບປຸງ,ຜ່ານຮ່າງເນື້ອໃນຄໍາຂວັນຂອງສະຫະພັນກຳມະບານລາວ ສະບັບປັບປຸງ,ຜ່ານຮ່າງບົດສຳຫຼວດການນຳພາລວມ ຂອງຄະນະບໍລິຫານງານ ສູນກາງສະຫະພັນກຳມະບານລາວ ໄລຍະ 1 ປີຜ່ານມາ.

——————————–

ໃຫ້ການສະໜັບສະໜູນໂດຍ: ບໍລິສັດ ເອັນເອສວີ ບໍລິການ ຈຳກັດຜູ້ດຽວ

– ບໍລິການຂາຍ, ສ້ອມແປງເຄື່ອງຄອມພິວເຕີ, ອຸປະກອນໄອທີ ແລະ ເຄື່ອງຮັບໃຊ້ຫ້ອງການ

– ໂທ: (+85621) 252 483